2012 оны 4 сарын 24-ны өдөр Монголын Архитекторуудын Эвлэлийн ээлжит зөвлөгөөн “МАЭ-ийн зорилт, гишүүдийн оролцоо” сэдвийн дор болж өнгөрлөө. Зөвлөгөөнөөр МАЭ-ийн хийж гүйцэтгэж байгаа ажлын тайлан болон цаашид хийх ажлын талаар танилцууллаа. МАЭ нь “2012 оныг Архитекторын боловсрол, сургалтын жил” болгон зарласан. Энэ чиглэлээр тодорхой ажил эхлээд байна. Хууль эрх зүйг боловсронгуй болгох чиглэлд төрийн байгууллагуудтай хамтран ажиллаж салбарын хуулиудын нэмэлт өөрчлөлтөд санал өгч, “Архитектурын тухай” хуулийн төсөл боловсруулав. Аймаг, нийслэлийн ерөнхий архитекторуудын зөвлөгөөнийг хийж тогтмолжуулж байна. МАЭ-ийн ордоны барилга угсралтын ажлыг өнгөрсөн 8 дугаар сарын сүүлчээр эхэлсэн ба 2012 оны 4 дүгээр улиралд ашиглалтад оруулахаар ажиллаж байна. Гишүүний үнэмлэхийг шинэчилж, татвар хураалтыг тэмдэглэдэг болгож, тэргүүний татвар төлөгч хамт олныг шалгаруулах, татварын баяр зохиох зэрэг ажлуудыг хийхээр төлөвлөж байна. МАЭ дүрмийн заалтынхаа дагуу МАЭ-ийн Удирдах зөвлөлийн шийдвэрийн дагуу МАЭ-ийн ерөнхийлөгчийн тушаалаар Ёс зүйн хороог байгуулан ажиллуулж эхлээд байгааг Та бүхэнд мэдээлж байна. Энэ хороог архитектор Ш.Бадамханд даргалж гишүүдээр Ш.Цэдэнпүрэв, Р.Баяр, Т.Ганзориг, Э.ПүрэвЭрдэнэ, Э.Дондмаа нар, нарийн бичгийн даргаар О.Уранчимэг ажиллана.